عمر ایوب، شیخ وقاص اکرم اور زرتاج گل کے وارنٹِ گرفتاری جاری

اسلام آباد: انسدادِ دہشت گردی عدالت نے پاکستان تحریک انصاف (پی ٹی آئی) کے تین رہنماؤں عمر ایوب، زرتاج گل اور شیخ وقاص اکرم کے وارنٹِ گرفتاری جاری کرتے ہوئے انہیں گرفتار کرکے پیش کرنے کا حکم دے دیا۔

تفصیلات کے مطابق اسلام آباد کی انسدادِ دہشت گردی عدالت میں سنگجانی جلسہ کیس کی سماعت ہوئی، جس کی صدارت جج طاہر عباس سپرا نے کی۔

سماعت کے دوران پی ٹی آئی رہنماؤں کی جانب سے سردار مصروف، آمنہ علی اور مرتضیٰ طوری ایڈووکیٹ پیش ہوئے۔

عدالت نے ریمارکس دیے کہ تمام ملزمان اب تک ایک مرتبہ بھی عدالت میں پیش نہیں ہوئے، لہٰذا ان کے وارنٹ گرفتاری جاری کیے جاتے ہیں۔

عدالت نے عمر ایوب کی حاضری سے استثنیٰ کی درخواست مسترد کر دی اور حکم دیا کہ تینوں رہنماؤں کو گرفتار کرکے عدالت میں پیش کیا جائے۔

بعد ازاں کیس کی مزید سماعت 20 اکتوبر تک ملتوی کر دی گئی۔